香港新浪網 MySinaBlog
« 上一篇 | 下一篇 »
Eric Yim | 23-10-07, 22:01 PM | 我的各樣介紹 | (287 Reads)

星期二,原本朋友約左我一齊去博物館,但點知原來博物館係休例二。逼不得已下,只好去搵套戲睇下。結果去左睇 "兄弟",10 個字可以講到劇情出黎「 江湖片、報父仇、兄弟猜疑 」。

近年都好難得接觸到呢類級數既電影,簡直係差到離譜。

先講講電影所 sell 既五虎,越期待、越失望。 

黃日華 - 响電影內全程扮演未來戰士 (Terminaotr) 中的亞諾舒華辛力加,講野一個字一個字跌出黎咁,又不分日夜帶住副太陽眼鏡。尾段時駕駛一部三輪車接載住陳奕迅追避仇家一幕,簡直係當年未來戰士 2 當中亞諾駕住部電單車載住主角逃避 T1000 追捕既翻版。

湯鎮業 - 只係演一個普普通通既奸角,爭坐上龍頭寶座。一個毫無特色既角色,如果吾係掛住五虎個名去拍呢部影電影,相信都好難搵個接呢角色 。

苗僑偉 - 一味要 sell 佢夠型,由頭到尾,除左影佢瞓醒覺一幕係著短褲加背心外,永遠都只係著住套西裝,响寫字樓開會著住、個老豆瓜左後响殯儀館又著住、連去到泰國同仇家打大架都係著住西裝(大家記住係熱辣辣既泰國),成套戲佢好似仲响度賣緊鱷魚牌西裝既廣告。不過,吾計一味 sell 西裝、sell 既好型既姿勢,佢係演到個角色要做既野,見到佢有內心戲,對佢細佬陳奕迅非正非邪既神情、動作,可以講一句,苗僑偉算係做到野。

陳奕迅 - 佢個角色係飾演一張白紙般既年輕人,外國回來,吾想以家族的黑幫手法去解決問題,一切都想以正途去解決。可惜,陳奕迅真係當自己係一張白紙咁演呢個角色,响差館向劉德華報案一幕,佢直情好似做緊一個中學生既表情......。都係唱歌啱陳奕迅少少。

劉德華 - 五個角色中,以佢個角色最正常,無論對白、表情、動作,而劉華亦做到佢個角色要做既野。不過,响戲中佢其實都係以一個接近配既人物出現,加上個劇本真係吾多掂,所以要以佢一人之力去支撐住部戲,都真係好吃力。

戲內邊有好多有問題既位置,更完全將整部電影拖垮。

  1. 身為警察既劉華,當有罪案發生後要向苗僑偉取口供時,可以自行進入苗僑偉屋企(咁影電中都有交待到苗僑偉屋企係有個工人响度,吾係屋企完全無人那種),但最搞笑係劉華响苗僑偉未返到屋企前响苗僑偉個後花園度打籃球喎,合吾合理呀 ! 有冇禮貌架 !
  2. 响殯儀館一幕,劉華一行人帶齊搜查令去搜靈堂,搜搜下,劉華有個兄弟吾生性,搞呀苗僑偉老豆幅官材,咁呀苗僑偉直刻火都黎埋,又要劏,又要殺。嚇到呀劉華即刻叫收隊走人,又係好吾合理,攞正牌去搜,俾人兇一兇,即刻叫走人,完全表露軟弱既一面。仲有,苗僑偉話要殺人既對白,好明顯係恐嚇,劉華咁都吾拉人,有冇搞錯。
  3. 身為龍頭既苗僑偉,要去泰國同死對頭湯鎮業決一死戰時,竟然兄弟都吾帶多少少响身邊。只係佢坐响涼茶舖等湯鏔業出現既一幕,見後有 2 個類似兄弟既物體出現過一陣,但之後已迅速消失左。打大架都吾帶 d 人响身邊,樣樣野都親力親為,呢個大佬真係吾易做。
  4. 陳奕迅演一個同黑幫毫無關係既角色,中段時佢以走佬既形式由苗僑偉協助坐船去泰國。到尾段時,苗僑偉自行回香港,只想將陳奕迅由泰國送返外國,但陳奕迅卻要親自去了解事情既始末,結果陳奕迅可以由泰國坐船返黎香港。不過,陳交迅吾係黑道中人,吾明咁有咩方法可以搭到路坐船由泰國返香港,睇黎泰國截架黑市船去遠行都好方便下,分分鐘仲易過香港截的士。
  5. 配音 - 電影大部份人把聲都係出番自己把原裝聲,唯讀是于榮光同黃奕,所以原本劇情中大家用緊自己把原裝聲,但只要一到于榮光或黃奕時,直刻變左配音,感覺十分怪。于榮光係一個大配角,問題都不大,因為戲份少、對白少。但黃奕身為女主角,下下一到佢既對白即變配音,問題真係大到不得了。咁奇怪既對白聲音,一係全套電影用配音,一係換一個講廣東話既女主角好過,而且黃奕個角色無咩特別,又係是但搵個女明星都可以做到。

一套以卡士去做賣點,相信出品人想做一部有內涵既電影,描述 2 兄弟的故事。但故事鬆散,處處犯錯,結果出左一部弱不禁風咁作品。

之前曾有報導陳奕迅一角起初希望找梁朝偉來演,好彩梁朝偉無演,否則只會浪費左好戲既梁朝偉。

還有一個角色不得不提,就係飾演劉華下屬既林家棟。呢套戲既佢,個演繹方法同 4、5 年前演 "無間道" 時完全一樣,對白又差吾多,表情又係咁。簽左俾劉華既林家棟,應該跟劉華學下戲喇,4、5 年黎都係咁上下既戲。


[1]

我第一次看到o的社團沒有跟班的,下下都要o的大佬自己來....

Carson
[引用] | 作者 Carson | 24-10-07 14:19 PM | [舉報垃圾留言]

[2] 咁即係叫我唔洗睇!~

kaka!~睇完你片野之後,,就知道兄弟係唔好睇架啦,,哈哈!~

﹍◎LoWrEnCe●◇
[引用] | 作者 ﹍◎LoWrEnCe●◇ | 25-10-07 22:10 PM | [舉報垃圾留言]