香港新浪網 MySinaBlog
« 上一篇 | 下一篇 »
Eric Yim | 18-03-07, 20:44 PM | 生活點滴 | (211 Reads)
人生總有第一次,中式婚禮就有去過,但西式要行教堂既婚禮就未試過,今日因為有一個舊同事結婚,結果我終於都去見識下西式婚禮。

教堂位於葵涌區,個禮堂吾算好大,我估應該都坐左三、四百人左右,而個禮堂有個樓上雅座,但無開放。小弟比較大鄉里,以為行西婚,會好似拍戲咁,新郎、新娘每人講聲 :「我願意 」,跟住拋花球就搞掂。但事實並非如此,婚禮開始時,由一對花仔、花女帶領新娘子入場呢 part 就梗有,但之後就開始唱歌,而且有幾首歌,歌與歌之間仲會有牧師講道、祈禱,總之真正既西式婚禮吾係好似電視咁短喇。仲有,當去到証婚呢 part,個牧師吾係好似電視咁講 :「 有冇人反對 」,係無既,我重申,電視同現實係 2 回事。咁交換戒指同新娘、新郎講心聲就係最後既結尾。成個婚禮結束後,就由 2 位新人同相關人士先後影相,但由於我要走既關係,所以我無影到相就走左。整個婚禮,由開始到我走既一刻,大既 75 分鐘左右。不過响我走時,新娘子都未拋花球,吾知係咪要等佢同所有人影完相先至做呢一 part 呢 ?

經過今日之後,有一點關於中西式婚禮既不同我係需要提出,就係有關一對新人講佢地既心聲時既情況。在中式時,大多數會在個酒席中(酒樓、酒店),各賓客坐响各自嗰圍枱度,但因為張係圓既關係,令有些賓客係背住或側面對住對新人 ; 而且有時去到呢 part 時係已經上緊菜,大家都開始食野,個感覺係大家都無咁留心去聽對新人講野,感覺無咁好 feel。但今日既西式婚禮上,對新人講心聲既一 part,我覺得就感人好多,整個禮堂既賓客,大家正面對住對新人,而且又無野食,仲有人真人彈琴伴奏,全場焦點係對住新郎、新娘,感覺真係好好多,聽出黎既說話亦都感人好多。


[1]

即是去教堂觀禮嗎?


[引用] | 作者 Jiu | 18-03-07 21:38 PM | [舉報垃圾留言]

[2]

無錯,係去教堂觀禮


[引用] | 作者 Eric Yim | 18-03-07 22:57 PM | [舉報垃圾留言]

[3]

對,西式著重內容.中式著重排場..


[引用] | 作者 carson | 20-03-07 23:59 PM | [舉報垃圾留言]