香港新浪網 MySinaBlog
« 上一篇 | 下一篇 »
Eric Yim | 25-10-08, 22:32 PM | 生活點滴 | (194 Reads)

公司近來有舉辦聯誼活動既習慣,繼燒野食、annual dinner、生日會後,今次輪到搞 7 人足球比賽。

原本以為足球作為一種大眾化既運動,會有好多人參加,結果卻只係剛剛好湊夠 4 隊參加,貨倉部一隊、舖面出 2 隊、寫字樓卻只係夾硬拉多 2 個吾識踢波既人先湊夠 7 個人參賽。

一向都係既會閒時打下籃球既我,都吾係好識踢波,但亦都不能幸免咁拉左去充軍。

 結果寫字樓既 7 壯士就响尋晚好壯烈咁去同其中一隊舖面隊比賽。

比賽開始前,原本我被安排打中場,但另一個應負責後衛既同事去左打中場,結果我只好不斷徘徊於中場同後防之間,再加上我打左手邊,可能因為大部份同事都係右腳既關係,所以大部份人都偏向右路站崗,結果我打既左邊經常都係由我一個人打晒,非常辛苦。

說回比賽,舖面隊既隊員個個年輕力壯,7 個人入邊,有 6 個係廿幾歲,相反,寫字樓隊 7 個人當中只有 2 個人係三十歲以下,整場比賽 25 分鐘,但十多分鐘之後,己隊有幾個隊友已經開始無體力,情況非常不樂觀。去到中後段時,更加係被一面倒被進攻。

可能大家真係少作呢類團體運動,所以有時少左一些機本上既進攻同防守意識。中前場既隊友經常徘徊於中場開波圈附近,回防意識比較薄弱。有時被對方截到波時或一些大腳長傳時,經常出現 3 打 3 或 3 打 2 既惡劣情況。直接導致大敗既結果。

雖然係大敗,但己隊既龍門 (呀健) 就不得不讚。原本熱愛打機既佢,平日不太多於運動,响大家遊說之下,一口答應出賽,更願意出任龍門一職。開波前我曾擔心佢會吾會企定定等個波射入網,結果係佢勇於救波,最重要係佢吾怕波,呢樣真係難得,要知道佢係人生第一次守龍門。所以雖然最後己隊以 6 比 0 大敗,但我個人完全吾覺得佢要一個人負責任何一個失波,輸波係 7 個人既事。

另一個要讚既人,一定係今次活動既搞手。佢要由book場、宣傳遊說人參賽、飲品安排、同其他部門協調要同事早放工去比賽。玩既人過癮、但搞既人辛苦,所以我真係要向佢致敬,「呀達,你要俾心機吖,我睇得出你搞呢單野搞到好辛苦架」。

P.S. 輸波後既寫字樓隊,已經無緣進入決賽,公司足球比賽對我而言亦等於結束了。