香港新浪網 MySinaBlog
« 上一篇 | 下一篇 »
Eric Yim | 01-02-06, 20:57 PM | 我手寫我心 | (2644 Reads)
呢個新年,我用左 4 日時間去睇完成套"大時代",呢套劇係 1992 年播出,當時呢套劇個勢係非常強橫,不過當時我只係間中睇,而且仲係由後段先開始睇,所以當時都好一頭霧水。時隔至今,套劇足足有 14 年之久,但睇完之後完全吾覺劇情老套,依然係一部非常好睇、非常經典既刻集。

套劇有 14 年歷史,所以 2 字頭或以上既朋友相信對呢套劇有印象。

呢段引文係故事簡介
「忠直仁厚的當紅股票經紀方進新(劉松仁)與貧窮粗鄙的丁蟹(鄭少秋)相交數十年,情同手足。一次,蟹衝動下殺死新,方家從此一落千丈,新遺下四個子女,幸得繼室羅惠玲(藍潔瑛)照顧,而蟹則流落台灣。
  十多年後,新長子展博(劉青雲)長大成人,卻一直投閒置散。後博得父舊友葉天(羅樂林)教誨,欲發奮圖強之際,得悉蟹已潛逃返港,他誓要替父討回公道,奈何蟹之子孝蟹(那仲衡)、利蟹(陶大宇)等為黑社會大哥,勢力龐大。博幾經辛苦,終使蟹被判極刑,但其噩夢亦逐一降臨:先是大妹芳(吳詠虹)背棄方家,幼妹敏(楊羚)不堪壓力而跳樓,甚至曾與孝相戀之二妹婷(李麗珍)亦難逃厄運。至此,博唯有遠走台灣。
  蟹以患癌為理由,獲提早假釋出獄,他雖失意於舊情人玲,事業卻一帆風順,更有意進軍股票界。此時,博得毒梟周濟生(劉江)、退休探長龍邦(曾江)相助,偕紅顏知己阮梅(周慧敏)及龍邦之女紀文(郭藹明)回港,並聯同婷好友陳滔滔(林保怡)秘密部署,終於把丁蟹一家打敗。」

部劇時間係由 1968 年一直去到 1994 年,呢段時間係香港既飛躍期,係香港既 "大時代"、"黃金時期",係令人非常懷念既時代。加上以馬鞍山既恒安邨作背景,令曾在恒安邨讀書既我更有一點親切感。

成套劇既人物有好明顯既正邪之分,好人吾會做做下變壞、亦無壞人走去改邪歸正,壞人就係丁蟹一家、好人就係方展博一家。不過呢套戲有一樣野拍得非常好既地方係做到角色既人性化,丁蟹雖然係壞人,但佢其實個心係好想幫人,佢做野係好光明磊落,吾會偷偷摸摸。至於佢 d 仔,雖然係黑幫頭子,但佢地係好有親情,對佢地既老爸丁蟹、呀嫲係好孝順、對自己親兄弟亦好互相幫助,呀大仔孝蟹就曾以身犯險去台灣救佢老豆。而主角方展博亦仔細咁講由一個廿歲出頭既無為青年,親眼睇住每個親人俾丁蟹一家害死,每個家人係死响佢面前,再加上經歷無數波折,令佢成為一個有為既人。所以最後佢係好開心咁見住丁蟹一家一個個跳樓,因為佢終於報左仇。除左 2 派人既人性化外,一些配角亦做到非常好,退休既貪污探長同大毒梟,雖然佢地一生人壞事做盡,但對親情亦非常重視。

套刻中有 3 part 戲拍得好好睇 :

前段戲由劉松仁同鄭少秋做主線,拍得好正,佢地 2 個真係交到戲出黎,鄭少秋做一個廿零歲既後生仔都咁似,而劉松仁由開始時做一個有為既副總裁到最後做一個傷左個腦既人亦演得非常精彩。佢地 2 個人既對手戲好多,真係戲技大鬥法。

另一段戲拍得好精彩既係講述鄭少秋被審訊殺劉松仁一案時,佢居然傻到吾要律師同佢打,選擇佢自己自辯,呢段戲講鄭少秋呢個吾識法律既老粗,响法庭做出好多滑稽既事。呢段戲係鄭少秋演技既show time,亦睇到呢套戲既故事真係好有心咁創作出來。

仲有一段拍得好好睇,講到劉青雲偶然得知周慧敏响台灣度,佢就响一曲 "紅河村" 引導下搵到周慧敏,之後一幕係周慧敏同郭藹明要劉青雲決定撰擇佢地兩個其中一個,成場戲劉青雲只係講一句說話 : 「都係一樣」表示佢都係無任何決定,其餘時間佢都只係用神情同動作去演,呢幕又係好正。

另外,丁蟹一角,非常成功,發展成有「丁蟹效應」,每逄鄭少秋有新戲做,股市就跌,不過呢個現象近年好似開始打破。不過其現丁蟹呢個人既性格係反映好多人一般既性格,丁蟹成日話「我想你好乍」、「我只係想幫你者」、「我為你好乍」,佢成日覺得自己既諗法係正確,佢係一個好主觀既人,呢種性格根本响社會上十分平常,自我中心,自己的做法是對的,自己的做法只係為了別人好。當然,戲中的丁蟹描述得有 d 極端。

14 年前的香港,用既係「 大哥大」電話,有事時要走去電話亭打電話,電腦仲係單色既年代,但完全無損套刻既質素,好戲就係好戲,就算過多 10 年或 20 年,呢套仍然係好戲。


[1]

套戲真係吸引,可能劇情又曲折離奇,而且節奏又恰當,唔會有悶場囉...

個陣日日都要追住睇先知佢每個劇情....少一集都唔得呀


[引用] | 作者 gOLdFiSh | 03-02-06 00:10 AM | [舉報垃圾留言]

[2]

人 善 人 欺 天 不 欺 、 人 惡 人 怕 天 不 怕.


[引用] | 作者 Carson | 05-02-06 23:24 PM | [舉報垃圾留言]

[3]

哈,過左3年之久,先睇到你個blog
剛剛用完3日時間睇曬呢套劇。
真係好好睇。佢地d演員做得好好,特別係藍潔瑛,同埋個故事好好
最遺憾就係最後連呀梅都死左,
不過續集就仲有呀梅,唔知點解呢,等我遲d睇埋續集先!!


[引用] | 作者 Vinci | 31-05-09 16:03 PM | [舉報垃圾留言]

[4]

HAHA,我最近也第五次番看此劇,開始睇到好多細節野,來自問自答。究竟阿博係因為兩個女人都愛,才要慳妹等到死的時候才能決定?...最後兩集,紀文找阿博告知慳妹時日焦無多,他其實仍是不想找她的,直至紀文說:四年了,什麼也煙燒雲散,我不會似慳妹咁長情,他冷笑一下,便去找慳妹。他冷笑,是笑自己自痴,多年來傷害著三個人,還是覺得紀文說不會愛他是違背良心的說話,我傾向前者。還有,他在恆安邨公園向慳妹剖白多年心繋著他,說自己唔夠勇敢同唔識講,到底,他是不是因為紀文的存在才「唔識講」,那他愛慳妹有幾多???開場無耐,慳妹說識著阿博真是麻煩,阿博有一句關鍵的句一早已說過,就是:你嫁左俾我仲麻煩呀!這可以肯定,他很早已愛上慳妹,但又為什麼為紀文而猶豫不決???


[引用] | 作者 VV | 16-11-09 04:30 AM | [舉報垃圾留言]

[5] Re: VV
VV :
HAHA,我最近也第五次番看此劇,開始睇到好多細節野,來自問自答。究竟阿博係因為兩個女人都愛,才要慳妹等到死的時候才能決定?...最後兩集,紀文找阿博告知慳妹時日焦無多,他其實仍是不想找她的,直至紀文說:四年了,什麼也煙燒雲散,我不會似慳妹咁長情,他冷笑一下,便去找慳妹。他冷笑,是笑自己自痴,多年來傷害著三個人,還是覺得紀文說不會愛他是違背良心的說話,我傾向前者。還有,他在恆安邨公園向慳妹剖白多年...


大時代2就有講到這問題,其實係佢一直唔想傷到任何人,即係唔想傷害紀文,所以無選擇到.其實係大時代1都已經有提示,就係佢去學校搵慳妹之後上到飛機,就攞左自己屋企張大合照出黎睇,之後再係銀包攞左慳妹張相出黎笑得好開心咁.就應該說明佢一早選擇了,只是不想傷到紀文所以係台灣學校果陣都無講出黎.


[引用] | 作者 lk | 04-08-10 17:05 PM | [舉報垃圾留言]

[6]

剛用了一個禮拜看完。真係好好睇。不知哭了多少次。雖然我現在從事股票行業,而劇中有關股票嘢不太真實。但仍然好好看。好感人。演員演技一流。正!過幾年會再睇。


[引用] | 作者 百迪 | 10-12-11 00:19 AM | [舉報垃圾留言]